Ngā Tohutohu
Tēnā, pānuitia ngā kōrero e whai ake nei, ā, whakautua ngā pātai hoki. E pai ana ngā whakautu poto.
He wāhanga tēnei nō te kōrero a Rāwhiti Īhaka i kitea nei i te pukapuka o Te Kōhure nā John Moorfield i te whārangi 189.
Ka takoto ngā patu
I te 25 o ngā rā o Āperira i te tau 1941, i te ono o ngā hāora i te ahiahi, e whakaputa ana mātou i te tāone o Athens e ahu atu ana ki Corinth Canal. E whā rau taraka, kī ana i te hōia, kotahi rau, koni atu rānei. E rima o ngā taraka nei i ngā Māori. Te mea tuatahi ko tō W. McKay, muri mai ko tō H. Hokianga, muri mai ko tō H. Wiremu, muri mai ko tō H. Ngata, muri mai ko te toenga o ngā Māori, i tōku taraka. He mea whakakī mai tō mātou taraka ki te Pākehā. Tokorima ngā Pākehā nei, nō Te Waipounamu katoa. Ko ngā taraka, me ngā motokā horekau i taea te mau, he mea pākarukaru, kātahi ka peipeia ki te moana.
Ko te tikanga mō te pākarukaru taraka, hei ā tuku te hinu me te wai kia rere mimiti noa, kua taraiwangia te taraka ki te taha o te moana. Tae atu, kua whakahorongia te haere o te initia pakaru noa i te wera. I te mea e tino wera tonu ana, kua tukia atu ki te moana, ki tētahi atu taraka. He taraka tino papai ngā taraka e pākarukarungia nei.
