Ngā Tohutohu
Pānuitia te kōrero mō te rā whakamaumahara e kīia nei ko Anzac e whai ake nei, kātahi ka whakautu ai i ngā pātai.
He pitopito kōrero mō te Rā Whakamaumahara ki ngā Hōia o Aotearoa me Te Pāpaka a Māui.
I te 25 o Paenga-whāwhā, i te tau 1915 i whawhai ngā hōia i te rohe o Tāke, i Kariporī. Ko te tino tikanga o tēnei pakanga, kia riro te rohe o Istanbul me te whakakorenga o te Emepaea o Ottoman. He tokomaha ngā tāngata i mate i taua pakanga, mai i ia tōpito o te Ao. E kīia nei e 87,000 koni atu ngā tāngata nō Tāke, e 44,000 koni atu ngā tāngata nō Wīwī me te Emepara o Peretānia, e 8,500 koni atu nō Te Pāpaka a Maui, ā, e 2721 nō tēnei whenua, nō Aotearoa (e tata ana tērā ki te kotahi o ia tokowhā i haere ai ki Kariporī i mate). Ahakoa kāore ā rātou ake whāinga i tutuki pai, ā, he parekura nui tēnei whawhai hoki, ko tēnei te orokohanga mai o te ‘ANZAC Legend’, he tohu, he hononga hoki e tino whakahirahira ana mō ngā tāngata o Aotearoa me Te Pāpaka a Māui hoki.
Ia tau, ia tau e whakamaumaharatia ana aua hōia me ētehi atu hōia i uru ai ki te ope o Tūmatauenga i mate, i hoki mai rānei i ngā whawhai. Ko te rā 25 o te marama o Paenga-whāwhā te rā whakamaumahara nei e kīia nei ko ANZAC. Ko te roanga ake o tēnei ingoa ko te Australian and New Zealand Army Corps. Hei tāpiri ki tērā, he papi te mea whakahirahira hei tohu ki te maumahara i aua hōia. E kīia nei, whai muri i te Pakanga Nui i te tau 1914 ki te tau 1918, ko ngā papi te putiputi tuatahi i tupu ake i te whenua o taua pakanga. Nō reira, mai i taua wā ko tēnei putiputi te tino tohu whakamaumahara o te Rā Whakamaumahara ki ngā Hōia o Aotearoa me Te Pāpaka a Māui, otirā ki ngā hōia katoa.
