Ngā Tohutohu
Kei te ngaro ētahi o ngā ingoa mai i te whakapapa kei raro iho. Pānuitia ngā kōrero e whai ake nei kia taea ai tō whakakī tika i ngā āputa ki ngā ingoa kei te ngaro.
Ko Wāta tōku hoa piri pono. I tērā tau i haere māua ki tātahi mō ngā rā whakatā, he whare tōna i reira. He whare whānau. I reira i tūtaki ahau i te nuinga o tōna whānau, mai i tōna koroua, a Heta, ko te matua tērā o tōna whāea a Mihi. He wahine hūmārie, tohunga ki te tunu keke. Ko tō Wāta pāpā, he tohunga hī ika, he tangata kaha ki te mahi hoki. Ko Hone tōna ingoa. Tokotoru ngā tuākana o Wāta, kotahi tana teina. Ko Punua te ingoa o te pōtiki o te whānau. Ko Rāpata te mātāmua o te whānau, kātahi anō ia ka whai tamariki, i tapaina tāna pēpi ki te ingoa o tōna matua. I a au e noho tahi ana me tana whānau ka tūtaki hoki i ōna tūpuna i te taha o tōna whāea, ko Matiu rāua ko Kararaina ō rāua ingoa. Ka mutu, i whai hoki tētahi o ngā tuāhine o Wāta i te ingoa o tērā o ngā tūpuna kuia. Ki a au nei, he tikanga tērā o te whānau o Wāta, nā te mea, ko tētahi anō o ngā tuāhine o Wāta, arā, a Miriama, i tapā ki te ingoa o tōna tupuna kuia o te taha o tōna matua! Heoi anō, ko Punua te kōtiro o te whānau e pai ana ki ahau. Kotahi noa iho te tau i waenga i a Punua rāua ko Wāta, nō reira, kua mātou tokotoru tērā kua tupu tahi i roto i ngā tau. I te mutunga o aua rā whakatā ki tātahi, i pātai ahau mehemea e pīrangi ana a Punua ki te haere i taku taha ki ngā pikitia, kotahi noa iho tāna whakautu ... āe!
