Ngā Tohutohu
Instruction
He aha te mea e kōrerohia ana i ngā kōrero nei? Pānuitia, ka whakautu ai i te pātai kei te mutunga o ngā kōrero nei.
Exercise
I te taha o Te Tai-o-Araiteuru te kāinga o Hana, kāore i te tawhiti atu i te tāone o Ōtepoti. I a ia e hīkoi haere ana i te one i tētahi ahiahi ka kite ia i ētahi tāngata i te taha o te wai e titiro ana ki tētahi mea. Ka whakatata atu ia, ā, ka uru atu ki te rōpū nei. Kātahi ka kite ia i tētahi mea e takoto ana i reira. Kua whara te paihau o te mea e takoto mai rā. Kua tata hemo taua mea.
Kāore ngā tāngata i te mōhio me aha e rātou hei āwhina i te mea e takoto mai rā. Nā reira, ka tīkina atu taua mea e Hana, ka haria ki tōna kāinga māna e tiaki. Ko tōna whakaaro, ki te ora taua mea he pai hei mōkai mā tana mokopuna, mā Hare. E whā ngā tau o Hare.
Ka horoia te paihau o taua manu e Hana, ka pania he rongoā ki runga. Ka hokona he ika, ā, ka whāngaia te manu. Kāore i roa, ka ora haere taua mea.
Ka tae mai a Hare ki te kite i tana kuia, ka kite ia i taua mea i te mahau o tōna whare ka mīharo ia. Ki a Hare, he mea ātaahua, ā, he kaha ngā ngutu o taua mea. Ka whakaingoatia taua mea e te tamaiti nei ko Purū.
Haere mai ai a Hare ki te kāinga o tōna kuia ia ahiahi, ia ahiahi kia kite i te mea nei, ā, ka rata mai ki a Hare. Ka tae mai a Hare ki waho i te whare, ka karanga ia i te ingoa o tā rāua mōkai, ka haere mai ai a Purū ki a Hare. He nui ngā ika i kainga ai e Purū, ā, ka pakari haere. He tino hoa rāua ko Hare.
Nāwai rā, kua pai haere te paihau i whara. Kātahi ka whakamōhio atu a Hana ki a Hare me whakahoki a Purū ki te moana. He nui te utu hei hoko ika mā tā rāua mōkai, he nui te mahi hei tiaki i a Purū. Ka kī a Hana ki tana mokopuna, ‘Kei te hiahia a Purū ki te hoki atu ki te moana noho ai. Kei te mokemoke ia i konei.’
Kāore a Hare i te hiahia kia whakahokia tāna mōkai ki te moana, ka kī ki tōna kuia, ‘Nāku a Purū.’
Ka rūrū te māhunga o te kuia, ‘Kāore i te tika kia noho a Purū i konei.’ Ahakoa ka tangi a Hare, ka haria tā rāua mōkai ki te one i kitea ai a Purū. Ka oma a Purū ki roto i te wai ka rere atu.
Hīkoi haere ai a Hana rāua ko Hare i te one ia rā, ia rā. He mokemoke nō rāua. I tētahi ahiahi i muri i te tōnga o te rā i te wā e pōuri haere ana te rangi, ka kite rāua i tētahi mea e puta mai ana i te wai, ā, ka karanga atu a Hare ki te mea rā, ‘Purū, haere mai, Purū!’ Kātahi ka whakatata mai taua mea ki a rāua. Anā, ko Purū, ā, ka pōpō a Hare i te māhunga o tā rāua mōkai. Ka mīharo rāua ki tā rāua mōkai e maumahara tonu ana ki a rāua.
Ki ōu nā whakaaro, he aha a Purū? _______________________________________________
Ki te kore koe e tino mōhio, tuhia ngā kupu hei whakakī i ngā ango nei.
